ആശുപത്രി നിര്‍മ്മാണം പുനരാരംഭിക്കണമെന്നാവശ്യപ്പെട്ട് CPI(M) മാര്‍ച്ച്

കല്‍പേനി (3/7/13):  ആശുപത്രി കെട്ടിടത്തിന്റെ നിര്‍മ്മാണം പുനരാരംഭിക്കണമെന്നാവശ്യപ്പെട്ട് സിപിഐ എം നേതൃത്വത്തില്‍ ആശുപത്രിയിലേക്ക് മാര്‍ച്ച് നടത്തി. പുതിയ കെട്ടിടം പണിയാനായി ആശുപത്രിയുടെ 80 ശതമാനത്തോളം ഭാഗം പൊളിച്ചിരുന്നു. എന്നാല്‍ കെട്ടിടത്തിന്റെ നിര്‍മ്മാണ പ്രവര്‍ത്തനം തുടങ്ങിയിട്ടില്ല. നിലവില്‍ ആശുപത്രിയില്‍ മതിയായ സൗകര്യങ്ങളുടെ അപര്യാപ്തയുണ്ട്. ഈ സാഹചര്യം കണക്കിലെടുത്ത് അടിയന്തിരമായി കെട്ടിട നിര്‍മ്മാണം ആരംഭിക്കണമെന്ന് സമരക്കാര്‍ ആവശ്യപ്പെട്ടു.

ആശുപത്രിയില്‍ മറ്റ് അടിസ്ഥാന സൗകര്യങ്ങളും ഒരുക്കേണ്ടതുണ്ട്. ജനറേറ്റര്‍ സൗകര്യം ആശുപത്രിയില്‍ ഏര്‍പ്പെടുത്തേണ്ടത് അത്യാവശ്യമാണ്. അള്‍ട്രാസൗണ്ട് സ്കാനിങ് മിഷീന്‍ അടക്കമുള്ള സൗകര്യങ്ങള്‍ ആശുപത്രിയിലുണ്ടെങ്കിലും ഇവയൊന്നും പ്രവര്‍ത്തനക്ഷമമല്ല. ഇതും പരിഹരിക്കപ്പെടണം. ഇന്ത്യന്‍ പബ്ലിക് ഹെല്‍ത്ത് സ്റ്റാന്‍ഡേര്‍ഡിലുള്ള കമ്യൂണിറ്റി ഹെല്‍ത്ത് സെന്റര്‍ സൗകര്യത്തോടെയായിരിക്കണം ആശുപത്രി കെട്ടിടത്തിന്റെ നിര്‍മ്മാണം പൂര്‍ത്തിയാക്കേണ്ടത്. മാര്‍ച്ച് ഡിവൈഎഫ്ഐ സംസ്ഥാന കമ്മറ്റിയംഗവും സിപിഐ എം ലക്ഷദ്വീപ് എല്‍സി കോര്‍ഡിനേഷന്‍ കമ്മറ്റിയംഗവുമായ മുഹമ്മദ് മുസ്ലിം ഖാന്‍ ഉദ്ഘാടനം ചെയ്തു.